Жетістікке жеткен адамның тарихы
Жетістік... Жетістікті адам әр түрлі түсінеді. Кейбірі мол байлықты, енді бірі атақ даңқты зор бағалайды.Дұрыс ақ... Байлықты адам маңдай терімен жинар, атақ даңққа еңбегімен жетер. Бірақ ішіндегі ең құндысы, бағалысы бойындағы тума талантын халыққа мойындатып, дарынымен еліне пайдасын тигізсе жетістіктің төресі сол болар...
Әңгімеме арқау болған Саяхат Оразбек 1996 жылы ақпаннның 3-ші жұлдызында дүниеге келді. «Анам – Күлзипа ақын, ұрпағын білім нәрімен сусындата білген ұстаз. Әкем қарапайым кәсіпкер. Ақындық қасиет анамның ақ сүтімен келсе, әкемнен табанды еңбек етуді үйрендім»- дейді кейіпкеріміз. Ата-анасы кең пейілді жаны жайсаң жандар еді. Балаларын ізгілікке, имандылыққа үгіттейтін. Берекелі, мерекелі шаңырақтан қонақтар үзілмеуші еді. Көпшілік келген сайын қос құлақты домбыраны қолға алып сусындап өскен халық әндерін шырқап, күй ойнап, өлең құрап таң қалдыратын. Жиналған қауым таңдайы тақылдаған кішкентай ұлдың бойынан бір ұшқын байқағаны ма, үнемі батасын беріп қайтатын. Әрине,балалық шақ адам өмірінің ең тәтті кезі. Тәрбиенің негізі де осы тұста басталады. Бұл уақыт тәтті қиялдармен асқақ армандардың мекені.
Оқушы Оразбек мектепте озат еді. Ұстаздары шәкіртінің алғыр, зерек, әдебиетке құштарлығын байқап, «бұлақ көрсең көзін аш демекші» жан- жақты дамуына, шыңдалуына себепкер бола білді.
Уақыт өте келе үлкен сахналарда өнер көрсете бастады. Ол өлеңді асқан шеберлікпен оқығанда тыңдарман жүрегін әсерге бөлемей, селт еткізбей қоймайтын. Бұл өнері Оразбекті биік шыңдарға шығара білді. Ол V облыстық Мұқағали оқуларының «Бас жүлдегері», республикалық кезеңнің «Арнайы жүлде» иегері, «Жырлаймын сені, туған өлкем» атты мүшәйраның І орын иегері, ІІІ облыстық Махамбет оқуларының «Бас жүлдегері». Бұл деңгейге жетуінде театр актерларынан алған сабақтарының орны орасан екенін байқауға болады.
Сонымен қатар поэзия әлемінде қалам тербеп жүрген жас ақын. Оның жүрегінен жарып шыққан отты жырлары Оразбектің ой-өрісінің кеңдігін, терең парасатын, кіршіксіз мөлдір сезімін, сөз зергерлігіне бейім екенін көрсетеді. Ықыласы мен ықтияты, дарыны мен қабілеті қабысқан жас ақынның өлең өнеріне деген құмарлығы ерекше. Шапқан сайын көсілген тұлпардай, жазған сайын шығармасынан шалағайлық аңғармайсың, керісінше даму мен түлегенін түгендейсің. Мысалы:
Құйғытса таймен құмартқан, бала,
Қырағы көңіл қыраттан қара.
Мендегі көңіл - өзіңдей шалқар
Жазира жазық мұнартқан дала,-
деген жолдар жас талаптың көңілінің көл дариядай екенін білдірсе, екіншіден, шын патриоттық жан-жүрегімен жазылған жалынды сөз екенін ескерткендей.
Құлпырар өссе топтаса кендір
Жағалай қонып қаптаса ел бір.
Мендегі сезім – сендегі бұлақ,
Сән берген саған тап-таза мөлдір.
Шыңына шығар орасан жол бар,
Беткейде бұлбұл тамаша ән жалғар.
Мендегі арман – сендегі таулар,
Сүрінген көздер қарасаң заңғар.
деген шумақтарынан шабытының шалқуына қоршаған ортасы сырға толы сулу табиғаты әсер еткенін байқауға болады.
Өнер үздіксіз ізденіс пен талаптылықты, табандылықты қалайды. Сондықтан да алтын уақытының көбісін кітапханада өткізетін. Қолынан Абай, Мұқағали сынды сүбелі сөз серкелерінің туындылары түспейтін.
Поэзиямен қатар ұлтымыздың хас өнері айтысты да қатар өрбітіп келе жатқан ұлан. Оқушылар сахнасынан бастаған құлшынысы облыстық, аймақтық айтыстарға да ат ізін салып үлгеріп, жетістіктер мен жүлделерге ілікті.
Өнердің қайнаған ортасында жүріп жақсы жайсаңдардың, сөз қадірін түсінген асылдардың ғибраты мол әңгімелеріне, ізгілікті істеріне куә болған еді.
Кейіпкеріміздің жан-жақтылығын дәлелдейтін тағы бір жетістігі Республикалық ғылыми жобалар сайысында топ жарып,жоғарғы оқу орнында тегін оқу грантын женіп алуы. Осылайша тынымсыз еңбек, ізденіс, табандылықтың жетістікке жетуге жол ашатынын көрсетті. Павлодар облысы әкімінің қабылдауында болып, құрмет граматасы мен «Дарын-2014» атағын алды.
Қазіргі таңда Павлодар мемлекеттік педагогикалық университетінің мақтаулы студенті. Ата-анасының мерейін асырған сүйікті перзенті. Біріне үлгі тұтар аға, біріне ізетті іні.
Раббыңның сезгің келсе мейірін
Кәлимамен ұштасқан жөн кей үнің.
Мастанбастан құрығында нәпсінің
Мінәжәтпен кеңейе түссін пейілің.
деп жырына қосқандай бес уақыт намазын қаза қылмайтын иманды жігіт.
Осылайша аз уақытта толағай табысқа жеткен бозбаланың шағын тарихын тарқаттым. Бүгінгі күн ертеңгі тарих. Тек маңызды, елеулі ұлы оқиғалар өшпес тарихқа айналары сөзсіз.