Ән: Сұлусың сен...
Сұлусың сен, табиғаттай тұнықсың,
Әсемдікпен әсерлі әлем құрыпсың.
Жабыққанда жараланған жанымды,
Дәл өзіңдей кім түсінсін, кім ұқсын?
Қайырмасы:
Сұлусың сен шаттанумен тек күлсең,
Күндіз есте,түнде түсте тек бір сен.
Өрнегіңмен өзі көркем өмірді,
Мәңгілік жас,мәңгі сұлу еттің сен.
Сұлусың сен, көркем мүсін,келбеттім,
Аққу болып,сезімімді тербеттің.
Жалын болып,жарқырадың жанымда,
Алыс кетіп,арман болып,шөлдеттің.
Сұлусың сен таңғажайып қалпыңда,
Жан дүниеңді теңеп жүрмін алтынға.
Нәзік гүлдей қалып қойдың жүректе,
Тағдырымен күресуші нар тұлға!
Сұлусың сен мөлдіреген күйде анық,
Имандылық,өн бойыңда ибалық.
Құдіреттен әсем әлем құлпырса,
Сымбатыңды қалғандайсың сыйға алып.
10.03.2009жыл.