Қазақ қызы...
Қазақ қызы сырыңды айтшы жасырма ,
Мен өзіңді теңеп жүрмін асылға .
Тектілігің тал бойыңнан есіп тұр ,
Жаутаңдама , ешкімге де бас ұрма .
Көтерілші , тапталмашы , басылма ,
Асыл едің басыңнан сөз асырма .
Өздеріңнен шуақ-нұр боп тарадық ,
Өздеріңмен жеттік жаңа ғасырға.
Сендер барда қазақ мәңгі көгерер ,
Әдемі боп ай сәулеңді төге бер.
Шаңырақтың біз ұстыны болайық ,
Сендерсіңдер мол байлыққа егелер .
Бота көзің айдын көлдей , тұнық тым ,
Көрген сайын көргім келіп құнықтым .
Қиялдаған , қия алмаған көзіңнен ,
Назын артқан , жақын тартқан сыр ұқтым .
Мөлдір едің ,бақытыңды таптың ба ?
Бұлақ едің өзен болып ақтың ба?
Жыр арнадым ,биік болып жүргейсің ,
Естелігі болсын сол бір шақтың да .
03.09.2003 жыл.