Question

О.АЛЛА... өлеңі

Answer 1

О.АЛЛА...
 
1.Алдыңа қалай барамын АЛЛА бас ұрып?
Күнәмді кешкен қаламын қалай жасырып?
Уланса сана, жаныма пана бере гөр,
Артықтау кетсем тасынып.

2.Өзіңде ғана әлемнің шексіз билігі,
Ғаламның өну, өсу мен өшу жиілігі.
Секундтар сайын өмірде қанша өзгеріс,
Сезімнің сөнбес сыйлығы...

3.Реттеуші өзің қаңбақтай құйын жалғанда,
Ажалдан аман тіршілік түбі қалған ба?
Иманмен сұлу, сәулемен пенде қоршалар,
Айналмас ақша қорғанға.

4.Ешнәрсе сенсіз ескерілмей ұмыт қала алмас,
Өзіңе ғана арнаған Адам ән алғаш.
Өзіңмен ғана иманмен ұйып әлем тұр,
Өзіңсіз мәнсіз, жалаңаш...

5.Жүректе болып, бәрін де көрер көктесің,
Түсінер бәрін иманға пенде жеткесін.
Тозаңдай тобыр тек сенің құлың екенін,
Сезініп өзін шектесін...

6.Басталар бәрі о АЛЛА сенің атыңнан,
Он сегіз мың ғалам құралған сенің затыңнан.
Тапсырыс алған жүз жиырма төрт мың пайғамбар,
Нұр шашқан уағыз хатыңнан.

7.Өзіңнен бәрі, тартылыс күш те заңдылық,
Шешетін сенсің, адамда мәңгі таңғы үміт.
Өткінші бәрі, жалғанмен тұрған жамалып,
Жасайтын сенсің мәңгілік!!!



8.Табары сенсің зарығып адам жеткенде,
Тіршілік өніп, көгерер қайта көктемде.
Үйлесім табар, үндестік алар өзіңнен,
Ерте ме, кеш пе, жығылар саған көп пенде.

9.Өзіңнен АЛЛА таңертең аман тұрғаным,
Сезіндім сенен өмірдің мәнін, ырғағын.
Сеніммен бірге сезіммен мүлде тартылдым,
Құрметім саған шын бағым!!!

10.Өткен ғасырда айға да тартқан көш кілең,
Американдық та ғарышта уағыз естіген.
Ұлылық сенсің әлемнің мәңгі иесі,
Бұлтта жыр-тамшы, көшкін ем...

11.Не деген әсем, әлемді сұлу жараттың,
Адамды биік саналы етіп тараттың.
Бай менен кедей, патша мен жарлы тергелер,
Алдында тозақ, жаннаттың.

12.Жақсылық көрдім, қолдағы барға қанағат,
Өзіңе алғыс, салмашы жанға жарақат.
Адамның ойы ғұлама болса жетпейтін,
Жердегі сенен шапағат...

13.Жұлдыздай жанып, фәниден лезде ағармыз,
Өзіңнен ғана жүрекке жылу табармыз.
Шешетін сенсің, кесетін өзің кесімді,
Бұлтартпас бұйрық алармыз...

14.Әр іске сабыр, бәріне АЛЛА тоба еттік,
Жалына жүріп, жақсылығыңнан дәметтік.
Барлығы сенен, тек қана сенің қолыңда,
Іздейміз салдар, себептік...

15.Қиындау сәтте өзіңнен тапқан күшін ер,
Ескертіп жерге өзіңсің белгі түсірер.
Заңдылықтардың бұлжымас бұйрық екенін,
Өзіңді танып түсінер...


16.Тіршілік бердің, ажал да қылыш іспетті,
Мықтымын деген секундта солып, күші кетті.
Құлшылық еткен өзіңнен нұрға бөленіп,
Тәкаппар болған түбінде бармақ тістепті.

17.Өзіңсің жұмбақ, құпия болып қалғансың,
Білім мен ғылым жете алмас мәңгі армансың.
Иманға бастар, мәңгілік асқар биікте,
Жүрекпен сезер АЛЛАМСЫҢ!!!

18.Жердегі шуақ, көктегі қуат өзіңнен,
Адамзат жайнар сен берген сырлы сезіммен.
Ынтымақ, бірлік-бақыт пен байлық бастауы,
Сақталар сабыр төзіммен...

19.Заңдылық бәрі, күн менен түн де алмасқан,
Асқар тау биік шыңдардың басын қар басқан.
Бәрін де елеп, бәрін де жебеп, сен тұрсың,
Мәңгілік болып жалғасқан...


20.Ғажап қой өмір, сезініп сені нәр алсақ,
Тек сенің нұрың бір тамшы қаннан жаралсақ.
Адасқан жандар аңсайды түпкі тамырын,
Қоғамда кейде сөз бөлек, істе мән алшақ...

21.Түсінбей тіпті өмірді еттік құрбандық,
Қызыққа ауып, мағына тауып құр қалдық.
Пейіште толып, періште болып келгенмен,
Сезбей де сенбей былғандық...

22.Шын өмір сенде жаныма пана бере көр,
Күн, бұйрық келсе өзіңе рухым жөнелер.
Өзіңнен ғана иманның нұрын сеземін,
Сеніммен тәнім теңелер...



23.Дірілдей соғар домбыра–жанның шанағы,
Құдіретіңнен адам да өзін табады.
Өзіңді ұққан әлемді сүйер адамзат,
Қадіріне жете алады...

24.Өмір-от кейде, жанымда аласапыран,
Демеуші өзің көмекке сені шақырам.
Адамға тапшы сабыр мен төзім,қанағат,
Жетпейтін мәңгі ақыл-мән.

25.Шырылдап келдік, зуылдап өтіп барамыз,
Көрінбес көзге ғаламда тозаң ғанамыз.
Берілген жанның аманат ғана екенін,
Сіңірер қашан санамыз???

26.Сезіндім сені, барлығы сенің арқаңда,
Өзіңе жақын пенделер мәңгі қалқанда.
Күн-түні сенің ұғындым ұлылығыңды,
Шапағатыңнан тіледім тілек әр таңда.

27.Өзіңнен басқа ойлардың бәрі көмескі,
Пенделік пайым, күнделікті күйбің демекші.
Сақтайтын жанды тек өзің ғана екенін,
Түсіне ала ма пенде ең есті?

28.Балшықтан болдық, топырақ содан жақындау,
Жердегі өмір-құдіретіңді танып, мақұлдау.

Айтылған бәрі, түсіне алсақ түбінде,
Жазылған құран қақында-ау.

29.Пенде ғой бәрі келбетке кері ауысар,
Қызықты қуып, бәрінен суып тауысар.
Тәкаппар көңіл пенделік күйге түскенде,
Өзіңді іздеп қауышар...

30.Өзіңнен ғана тіршілік түбі теңескен,
Ұтылар пенде өзіңе қарсы егестен.
Жамандық төзбес өз-өзін бір күн жояды,
Жақсылық жайнап, өзіңмен мәңгі тел өскен.

31.Ерекше таңнан сұлулық сезіп, сыр ұқтым,
Сезініп сені, керемет күйде тынықтым.
Әлемге қамқор шарапатың шалқып тұрғанын,
Ұғынып саған құнықтым.

32.Кеудеме нұр боп беймәлім шуақ төгілген,
Жанымнан жыр боп төгілмес сірә тегіннен.
Бұлбұлдар сайрап, дүние жайнап тұрғанда,
Күн болып күлдің көгімнен.

33.Санама құйдың саналы ойды сарқылмас,
Адамда арман, таусылмас уайым, жан тынбас.
Сезінген сені әлемге қорған бола алар,
Пенделер бар ғой басынан пайда артылмас.

Answer 2

34.Обалды әркез ойлансам сенің барлығың,
Сауапты жасау-шығарған сенің жарлығың.
Борышты сезу-өзіңнен ескен үйлесім,
Құдайдан қорқу-таңғы ұғым.

35.Не деген әсем, әлемді сұлу жаратқан,
Жан берген жанға дегендей әркез талаптан.
Ақ жүзін жарық иманын берік ете гөр,
Шығармай адам санаттан.

36.Өз-өзін таппай адасқан жандар саны аз ба?
Тағдырды жасар өзіңсің салар таразға.
Мұсылманшылық-мойын ұсыну, тең ұстау,
Сабырлы болу тағдырдай ыстық, аязда.

37.Не жетсін шіркін үндесіп өмір сүргенге?
Үйлесім табар көңіл де нәзік гүлден де.
Тек сенің арқаң, сөйледім сенің атыңнан,
Әйтпесе қайдан тіл менде?

38.Парасат пайым, сезетін сезім көз бердің,
Саналы етіп, ұғынысатын сөз бердің.
Ғарышқа самғап, ғылымды қармап жеткенде,
Пенделік пиғыл өзгердің...

39.Дұрыс жол іздер құдіретіңнен қорыққан,
Өзіңнен пана табады түрлі торыққан.
Тек сенен әмір, ажалсыз пенде оралар,
Қатерлі соғыс жорықтан.

40.Сезінбей сені пенденің күні қараңғы,
Өзіңмен ғана жаза алдым жанда жарамды.
Тоба еттім АЛЛА жаныма жарық бере гөр,
Түйсік бер тағы ажыратар адал арамды.

41.Ынтымақ-бірлік ұғымы сенен таралған,
Сыйластық әркез кетпейді сіңген санамнан.
Үлкенді қалай қадірлей алсаң күте бер,
Ендігі құрмет кішіден, бала шағаңнан.

42.Ғажап қой өмір, берекесі кірсе үйімнің,
Шешуі сенде мағына, мәннің, түйіннің.
Сезіндім сені, өзіңе шексіз алғысым,
Бастауы сенде әлемде көрген сыйымның.

43.Жебеуші өзің жарылқаушым болып танылдың,
Жұлдыздай ағар, жас болып тамар ағынмын.
Жердегі күйбің әйтеуір бір күн таусылар,
Жанымның жұмбақ ақырын ойлап, табындым.

44.Құдіретті ұғым өзіңнен сана ашылған,
Оқыған ұғар жырларым жойқын жасыннан.
Ақырзаман боп адамзат құрып кетпеуге,
Бұл да бір қадым, өзіңе өрнек асылдан.

45.Күй толы кеудем, гүлденді көңіл көктемі,
Үмітін артар диханның шықса еккені.
Сәбидей көркем әлемге қамқор бола гөр,
Алсаң да АЛЛА тек мені.

46.Шырылдап жаным құштар боп өмір сүруге,
Сая боп санам ынтызар бәрін білуге.
Абырой берші арымды асқақ ардақтап,
Адам боп әркез жүруге.

47.Қуаныш көрсем өзіңнен екен, соны ұқтым,
Жақсылық тілей жақсы жандарға жолықтым.
Өмірге ғашық сезімім саған бастады,
«Бастауы сен»-деп қорыттым.

48.Арманым алыс, қиялым қашық тілекте,
Өзіңді сезер көңіл де алаң дір етпе.
Баянсыз болса жарысып жалған өтер-ау,
Өзіңсің мәңгі жүректе!

49.Тоба еттім АЛЛА қанағат пенен тойым бер,
Нысапсыз пенде ең соңғы қалған қойын жер.
Жақсылық тілеп, әлемге қамқор бола алар,
Өзіңді ұққан зейінді ер.

50.Нәпсіні тыйу-өзіңнен келген жарлық үн,
Көздері тоймас пенделер білер бар мінін.
Бір сөзден таймас іріден ұрпақ майда боп,
Көтере алмауда ар жүгін.

51.Пенде боп тұрып адамдар биік талғамда,
Тәкаппар көңіл толмайтын күйік арманда.
Өзіңді сүйіп жақсылықтарға жетсінші,
Өткінші мынау жалғанда.

52.Жыр еттім сені, әлемге маржан шашқандай,
Баянды болмас барлық іс сенен басталмай.
Сезіндім сені санаммен, ынтық жүрекпен,
Қыран боп тұрып, жанардан тағы жас тамбай.

53.Тоқтамас өмір, жақсылық үшін күресің,
Иманға бастар тамшыдай жырым үлесім.
Саналы жанда бір АЛЛА тұрар жүректе,
Сеніммен өмір сүресің.

54.Ертеңге деген үмітпен тағы таң атты,
Гүлдентті сәуле тіршілік атты алапты.
Абырой берші жаныма жарық жаратқан,
Адастырмашы адамдық сәби санатты.

55.Сөнбестей мәңгі жанымның жарық сәулесі,
АЛЛАҒА ауып пенденің кіргей жерде есі.
Өзіңе өшпес өзгеше өрнек өрілді,
Табынған күйдің термесі.

56.Тіршілік-түйткіл, өмір де мынау қас қағым,
Тартылыс күш те өзіңде, ұлы асқақ үн.
Тамшыдай жырым тәубеге елді келтірсе,
Құдіретіңді келді растағым.

57.Өзіңмен үндес жақсылықтарға кезігу,
Бақыт та, бақ та, тірілу, қайта көз ілу.
Керемет етіп жараттың барша әлемді,
Ғанибет қандай өмірді сенімен сезіну.

58.Сезіндім сені алыстап менен кетпеші,
Ерте ме, кеш пе ұғындым сені, сөкпеші.
Өзіңмен ғана иманға ұйып, тәубе етсем,
Жанымның нұрлы Меккесі...

59.Адамдар ұқсас бұрала өскен қайыңға,
Шаттанып күлер, тағдырмен жүдер уайымда.
Бүгінгі күннің қонағы болған пенделер,
Ертеңгі күнге дайын ба???

60.Армандар шексіз, ал өмір қысқа, шектеулі,
Бұйырдың АЛЛА иманға ерте беттеуді.
Білмейді-ау пенде ғұмыры бейне арғымақ,
Дайын тұрғанын ерттеулі.

61.Адам боп келіп, пенде боп итше таластық,
Бал болып келіп, малдан да кейде ары астық.
Тобаға келу, тазалық АЛЛА өзіңнен,
Иманға ұю-үндестік, мәңгі жарастық!!!

62.Адам боп жансақ өзіңнен АЛЛА ұшқыны,
Мәңгілік сенсің адамгершіліктің ұстыны.
Алыпты тозаң, мөлдірді қатты еттің сен,
Орнына қойдың күштіні...

63.Құдірет сенде, ұлылық саған жарасқан,
Жете алмай саған тіршілік ғұмыр таласқан.
Тек сенің арқаң шетсіз де шексіз дүние,
Бас иіп сенімен санасқан!!!

64.Ешнәрсе тағы ескерілмей қалмас тасаңда,
Адамзат жырдан жылынса сыйым осы АЛЛА.
Өзіңе деген сеніммен иман ұлғаяр,
Тіршілік жайнар қашан да!!!
                                     
                                                           Төкеев Бертай Есмаханұлы.
                                                           27.04.2010жыл.