Сұлу-Жер Ана.
Мен сезіндім сұлулықтың тұнығын,
Бақытыма санадым да мұны мың.
Сымбатымен сыршыл етті сананы,
Жалындаған жанарынан жылыдым.
Көз алдымда тұрып алды от бейне,
Күндіз естен, түнде түстен кетпей де.
Сағынышпен арпалысар бұл жүрек,
Аңсары ауып көркем қиыр шеткейге.
Табиғаттан жаралғандай таңдалып,
Шуақ шашқан шырайынан жанданып.
Назы ерітіп,сазы елітіп, елікше,
Мүсініне көз тоймады таңқалып.
Мен сезіндім нұрын шашқан бір айды,
Көріктіге көңіл ауған сыңайлы.
Бүкіл әлем сұлулықпен ұсталып,
Сұлулықсыз сиықсыз боп құлайды.
Тек сұлулық барлық жанға ұғымды,
Бас иілді,қанша тізе бүгілді.
Сұлулықты сақтап тұрған Жер-ана,
Тілеп жүрмін күн-түн амандығыңды!!!
05.03.2009жыл.