Сақтану керек...
Сақ болу керек, Алладан соны тілеп тұр,
Жарқырар күннің артында түн тұр, түнек тұр.
Ажалдың айқын екенін тағы ескертіп,
Көрлерді қазар қайраулы қара күрек тұр...
Сақ болу керек, әр сөзде, әзіл айтқанда,
Жаралар жебе өзіне қайта қайтқан ба?
Бір аяқ төрге, бір аяқ көрге тартарын,
Бейхабар адам осынау айқын жайттан да.
Сақ болу керек, ірілер кетті майда боп,
Екі жүздіден тектілік іздеп пайда жоқ.
Ойлану керек, қасиет құрып кетпеске,
Қолға алу керек, сұмдыққа қалай айла жоқ?!
Сақтану керек, жер кетті түпсіз тесіліп,
Уланды бәрі, аяусыз жаншып, кесіліп.
Раушан гүлді дайын тұр тікен тырнауға,
Тамырын буып, ажырық кетті есіріп.
Сақтануымыз керек, тезірек шығып жарыққа,
Кінәні артпай біреуге, ессіз нарыққа.
Еліңнің құрып кетпесі үшін күні ертең,
Өзіңді таны, болашағыңды айқын анықта!!!
08.11.2008жыл.